الإرشاد السوداني

رفع الوعي عبرنشر ونقل التقانات الزراعية بشقيها للمستفيدين

 انعقد المجلس القومي للشمارات للنظر فى الاستعدادات للموسم الزراعي الصيفي وكانت الجلسة مخصصة لموضوع التقاوي وحال دخولها القاعة احتجت حاجة اصيلة على الموضوع قائلة " ياجماعة دا موضوع تنادونا ليهو والفلسفة العليكم شنو التقاوي دي شنو غير باقي محصول الموسم السابق ولا من اي فراشة نجيب لينا تيراب ندفنوا؟" وانا قايلة ناديتونا عشان تدونا التعويضات فى جدادنا الكتلتو لينا دا؟" وهنا ايدتها حاجة مسيكينة قائلة " آي ياهو الكلام كلام التعويضات وقسماً عظماً ان ما ادوني التعويض المرة الجاية بدسو فى دولاب الهدوم وبالنسبة للتقاوي انا احمد الله عندي تيراب من محصول الموسم الفات" .. وهنا سألتها حاجة ارشاد " بالاوال السنة المضت زرعتي كم مخمس يا حاجة اصيلة فاجابتها اربعة مخمسات وهنا سألتها مرة اخري وجابتلك كم شوال؟ فاجابتها ما شوالين ونص ! وتدخلت حاجة مسيكينة قائلة انا ذاتي زرعتهن اربعة مخمسمات وجابن لى شوالين! يعني انتي تيرابك البتسميه تقاوي دا بشيل قندولين ولا قندولين!!! فاجابتها حاجة ارشاد تيرابي ما بشيل قندولين لكن لو زرعت بيه مخمساتك ديل بجيبن ليك على الاقل اربعة شوالات! وعنها قالت مسيكينة طيب كدي حديثينا عن تقاويك دي! وفى هذه اللحظة قدمت لهن الشابة تقاوي وقبل ان تبدأ الحديث اعتذرت لها حاجة اصيلة قائلة معليش يا بتي وسوري ذي ما بتقولن لكن نحن من زمان قاعدين نحضر تواريبنا ذي ما سمعتي لكن العلم نورن وطيبت الشابة تقاوي خاطرها ثم تحدثت قائلة : البذرة الجيدة او المعتمدة وهنا قاطعتها شمشارة قائلة " الجيدة عرفناها لكن المعتمدة دي شنو يعني رئيسة محلية؟" وتدخلت حاجة ارشاد قائلة خلوها تنضم يا جماعة ما تشبو ليها فى حلقها وكدي واصلي يا تقاوي فقالت : طيب البذرة المعتمدة دي هى البذرة الجيدة وعندها صفات اولاً لابد ان تكون نسبة انباتها عالية وفى السودان عندنا الحد الادني من الانبات يكون ثمانين بالمائة ، وهنا تدخلت مسيكينة متسألة انبات يعني شنو ونسبة يعني شنو؟ فأجابتها تقاوي " يعني لو اخذت مية حبة من التقاوي وزرعتيهم فى ماعون وعديتي النباتات القامن لازمن يكونن ثمانين او اكثر واذا اقل يعتبر التيراب دا ما جيد" والصفة الثانية للبذور الجيدة ان تكون البذور نظيفة بمعني خالية من الامراض واصابة الحشرات وخالية من  بذور الحشائش والبذور الغريبة والمكسورة ومن المهم جداً ان البذور تكون من حجم واحد يعني ما حبة صغيرة وحبة كبيرة" وهنا سألتها حاجة اصيلة " هسع البذور بالسماحة دي بطلعوها كيفن؟" فاجابتها تقاوي : انتاج البذور عملية طويلة ومحتاجة خبرة كبيرة وماكينات نظافة وعند زراعة الارض للتقاوي  تخضع الحقول للتفتيش من الزراعة حتي الحصاد ومنتجي التقاوي عندهم سجل عندنا ولمنع الغش تم عمل قانون للتقاوي يوضح كيفية زراعتها وتداولها والاتجار فيها. وهنا سألتها حاجة مسيكينة " ولو الواحد ما لقي تقاوي يعمل شنو" فاجابتها عليه اولاً عند حصاد المحصول ان يعزل القناديل السمحة ويحصدها براها وقبل الزراعة يغربلها بغربال خشن وغربال ناعم" وعندها لم تتمالك شمشارة نفسها وقالت( طيب مادام عندكم قانون يمنع الغش ناس فلان ديك ما سمعمتوابيهم).

المصدر: مختار احمد مختار- مدير إدارة الارشاد- الادارة العامة لنقل التقانة والارشاد
  • Currently 0/5 Stars.
  • 1 2 3 4 5
0 تصويتات / 450 مشاهدة

ساحة النقاش

الارشاد السوداني

sudaextension
نحن مجموعة من المهنيين المحترفين في مجال الإرشاد الزراعي والحيواني نسعي لتطوير وترقية الإنتاج الزراعي بشقيه لدعم الأقتصاد ورفع مستوي المعيشة ومكافحة الفقر عبر استخدام آليات الارشاد ونشر البحوث العلمية الرصينة »
جارى التحميل

تسجيل الدخول

عدد زيارات الموقع

765,370